Ինչու չի կարելի ուշ երեկոյան ուտել. news.am

Պակաս կարեւոր չէ այն, թե մենք որ ժամին ենք սնվում, քան այն, թե մենք ինչ ենք ուտում, պնդում են Սոլկայի Կենսաբանական հետազոտությունների ինստիտուտի մասնագետները: Նրանց խոսքով՝ օրգանիզմն ավելի ճիշտ կաշխատի, եթե հետեւենք պարզագույն կանոնին՝ չսնվել 12 ժամվա ընթացքում՝ երեկոյան ժամը 20-ից մինչեւ առավոտյան ժամը 8-ը:

Այս ռեժիմը պահպանելու դեպքում, մասնագետների խոսքով, նիհարելն ավելի դյուրին է՝ անկախ այն բանից, թե ինչ մթերք կուտենք ցերեկը:

Եթե 24 ժամվա ընթացքում սնունդը օրգանիզմ է մտնում տարբեր ժամերի, եւ նման անկանոն սննդակարգը օրեցօր պահպանվում է, ապա դա կարող է օրգանիզմում հանգեցնել տարբեր խանգարումների, կարծում են մասնագետները: Պարզվում է՝ սննդի ընդունման ժամերի փոփոխությունն է ազդում լյարդի հազարավոր գեների աշխատանքի վրա: Այսպիսի անբարենպաստ փոփոխությունները հղի են շատ այլ օրգանների ֆունկցիայի եւ նյութափոխանակության խանգարմամբ:

Այդ է պատճառը, որ անկանոն կամ գիշերային ուշ ժամերին սնվող մարդիկ առավել հաճախ են բախվում շաքարախտի եւ ճարպակալման խնդրին, ընդգծում են մասնագետները: Նրանց կարծիքով՝ կարեւոր է պահպանել սնվելու ամենօրյա երեքանգամյա ռեժիմ նույն ժամերին՝ մինչեւ երեկոյան ժամը 20-ը: Դա հնարավորություն կտա բարձրացնել նյութափոխանակության գեների ակտիվությունը, լավագույնս տեղաբաշխել սննդից ստացվող էներգիան եւ հեշտությամբ այրել շաքարն ու ճարպերը:

Հարցեր, պատասխաններ, մեկնաբանություններ